Ezker Abertzalearen Zutik Euskal Herria ebazpena aztergai
Ezker Abertzaleak aldaketa politiko gauzatzeko prozesu demokratikoa abiatu du. Agortuta dagoen gaur egungo marko juridiko-politikoa gainditu eta aukera politiko guztiak barnebilduko dituen marko demokratikoa erdiestea du helburu. Gutxieneko oinarri demokratikoak eta gaur egungo salbuespen neurriak gainditzea izango luke lehen geltoki prozesu demokratikoak. Ondoren, azken negoziazio prozesuan landutako eduki politikoetan oinarritutako akordio demokratikoa erdietsi beharko lukete Euskal Herriko eragile ezberdinek. Juan Manuel Erasun, Tolosaldeko Ezker Abertzaleko kideak eman dizkigu prozesu honen inguruko xehetasunak. Baikorki baloratu du, "Independentistak" izeneko ekimena, ebazpenean landutako indar metaketaren estrategia berriari lotzen baitzaio askotariko independentistek osatutako sarea. Ezker Abertzalearen baitan eman den eztabaida prozesuaz eta honek utzi duen emaitzaz aritu gara Juan Manuel Erasunekin.
<< Juan Manuel ErasunEskola handitzeko eta igerilekua egiteko proiektuak Asteasun
Asteasuko Pello Errota txiki geratu da. Ikasle kopuruak gora egin duenez, Asteasuko Udalak, eskola berritzeko lanari ekin dio. Eusko Jaurlaritzako Hezkuntza Delegaritzarekin hitzarmena sinatu ondoren, Lehen Hezkuntza eraikina birgaitu eta haurreskola eta sei urte bitarteko umeentzako eraikin berria egingo dute. Guztia, gainera, lotuta geratuko da eta eskola gune bakarra izango da herrian. Horrekin batera, Asteasuko Udalak, herritarren eskaerari kasu eginaz, igerilekuak zabalduko ditu udararako. Larraulgo errepidearen eta Usarrabi errekaren artean egingo dira: bat helduentzako eta bestea berriz, ume eta gaztetxoentzako. Gainera, aldagelak, komunak eta taberna jasoko dituen eraikin bat ere egingo dute igerilekun ondoan. Inaki Amenabar, Asteasuko alkateak eman digu proiektu hauen berri.
<< Inaki AmenabarOstiralean langile bat hil zen Alegin lan istripuan
Joan den ostiralean (hilak 5), beste langile batek galdu zuen bizitza. 61 urteko langile lasartearrak istripua izan zuen Alegiko Errotaldea Fabrensa industriagunean. LAB sindikatuak gogor salatu du heriotza. Sindikatuaren ustez, "lan istripuak ez daude zoriaren menpe, enpresarioaren jarreraren menpe baizik; hauen eskuetan dago enpleguaren kalitatean eta prebentzioan inbertitzea". Azken heriotza honekin, 16 langile dira Hego Euskal Herrian lan istripuan hil direnak. Hori guztia salatzeko, LABek elkaretaratzea egingo du bihar (hilak 10) eguerdiko 12.00etan Alegiko udaletxearen aurreran.
<< Haizea MendiaEskualdeko emakumeekin solasaldia martxoaren 8a dela-eta
Tolosaldeko hiru emakume gonbidatu ditugu gaur Txolarre Irratiko kabira. Izan zitezkeen beste batzuk, sinistuta baikaude eskualdeko emakume guztiak dutela zeresana. Euren esperientzia azaltzera gerturatu zaizkigunak, ordea, Marimi Ugalde, Irurako alkatea, Arantxa Sorrondegi, Urkizuko Alur Txiki Elkarteko kidea eta Ainhoa Esnaola villabonako gaztea izan dira. Hiruek ere aitortu digute, aurrerapausoak eman diren arren, oraindik ere asko dagoela egiteko gizon eta emakumeen arteko parekidetasunean. Aritu gara ardurak konpartitzeaz, lan munduan emakumeek jasaten duten diskriminazioaz, eraso sexistez eta egunerokotasunean emakumeek dituzten zailtasun eta trabez. Gogoratu gara, "lehengo amonen zapi gaineko gobaraz" eta noski gogoratu gara "lehengo amonaz gaurko amaz eta alabaz".
<< Emakumeen tertuliaIbon Artola: "Emakumeen zapalkuntza kapitalismoaren dago lotuta"
Euskal Herria Sozialista aldizkariko kide eta Txolarre Irratiko kolaboratzaile Ibon Artolak asteroko bisita egin digu "Tolosaldeko Ahotsa" saiora. Aste honetan, Martxoaren 8a izan du hizpide: Emakume Langilearen Nazioarteko Eguna. Aldarrikapen egun honen jatorriarekin begiratzearekin batera, Ibonek esan du "gaur egungo sistema patriarkal eta kapitalistak zapaltzen duela emakumea". Bere hitzetan, "gaur egungo sistema kapitalistan, ezinezkoa da, emakumeak etxeko lanen esklabotzatik liberatzea". Parekidetasunean oinarritutako jendarte baten aldeko borrokara, emakume eta gizonezkoak bat egin behar dugula uste du anoetarrrak eta horretarako ezinbesteko pausotzat hartzen du, gaur egungo sistema kapitalistarekin amaitzea.
<< Ibon ArtolaAhoz Aho, Nazioarteko Ahozkotasunaren Jaialdira iritsi da gure eskualdera
Hirugarren aldia da hemen gure eskualdean "Ahoz Aho" jaialdia antolatzen dela. Estatu mailan "La Caratula" izeneko taldeak antolatzen du jaialdia eta Asvinenea Arte Eszenikoen Laborategia arduratzen da Euskal Herrian ekitaldiak antolatzen. Ordizia, Tolosa, Aduna, Villabona eta Andoainen egunotan, ipuin kontalariak arituko dira saioak eskaintzen. Lehen ekitaldia, "Kandelen Argipean" izenekoa izango da eta bihar (hilak 6) eskainiko dute Tolosako Triangulon. Gainera, aurten, Venezuela, Peru, Mexiko, Colombia, Uruguay eta beste hainbat lekutatik etorritako kontalariak arituko dira Nazioarteko jaialdian. Azkeneko festa, Asvinenean egingo dute Adunan. Hilaren 13rako prestatu dute jaia eta egunotan gurean aritu diren kontalari guztiak bilduko dira bertan. May Gorostiaga, Asvineneako kideak emango dizkigu azalpen gehiago.
<< May Gorostiaga"Bilbao-New York-Bilbao" nobelaz hizketan Kirmen Uriberekin
2009ko Espainiako Narratiba Saria eman diote Kirmen Uriberi "Bilbao-New York-Bilbao" liburuagatik. Tolosan izango da bihar (hilak 5) idazle ondarrutarra Mikel Urdangarinekin batera, "Internet Kafe" izeneko ikuskizuna eskaintzen TOPICen. Emanaldi hori aitzakiatzat hartuta hitz egin dugu Kirmenekin eta bere lehen nobelaren hainbat ezaugarri eman dizkigu ezagutzera. Molde berritzaileen aldeko apustua egin du idazleak bere lehen nobelan, horrek dakarren arriskuarekin. Trama jakinik gabe, ahalegin estetikoa egin duela aitortu digu Kirmenek. Autofikzioaren bidetik, istorio ugari josi ditu kontakizunean. "Injenieritza" lana izan dela esan digu idazleak eta ahalegin hori eskertzen ari direla sumatzen du azkena jaso duen sariari erreferentzia eginez. Kirmen Uriberekin izan dugun solasaldi atsegina entzun dezakezu hemen.
<< Kirmen UribeJoseba Otaegik irabazi zuen igandean Aletx Txikonen aurkako desafioa
Igande arratsaldez jokatu zen Azpeitiko zezen plazan Joseba Otaegi eta Alex Txikonen arteko apustua. 100 kiloko zilindro zaharrari 25 jasoaldi eman zizkioten bi kirolariek eta hiru minutu pasatxoko denbora behar izan zuten horretarako. 14 kanaerdiko ebakitzea zuten hurrengo lana. Aurreikusi bezala, aizkoran atera zion abantaila gehien zizurkildarrak lemoarrari, 11 minutuko aldea hain zuzen. Hiru akziotara jokatutako apustuan, azkeneko eginkizuna, Azpeitiko zezen plazan anilloan, 7 kilometro korri egitea zen. Proba honetan, bizkaitarra bizkorrago ibili zen, baina ezin izan zuen 11 minutuko errenta jeitsi. 7.000 euro jokoan zituen alde bakoitzak, 1.500 lagun inguru gerturatu ziren Azpeitira eta giro ona nagusitu zen. Joxe Anjel Sarasola lankideak eman digu, besteak beste, apustuaren berri. Bide batez, desafioaren aurretik, Joseba Otaegi berari egindako elkarrizketa ere entzun dezakezue atala honetan.
<< Joxe Anjel Sarasola<< Joseba Otaegi
Saharako maratoian parte hartu duten gure eskualdeko herritarrak
Otsailaren 22an ospatu zen 10. aldiz Saharako Maratoia Tindufeko errefuxiatu kanpamenduetan. 80 euskaldunek hartu dute parte aurten lasterketan eta horietako lau gure eskualdeko herritarrak izan dira. Handik bueltan gonbidatu ditugu gure kabira eta maratoiaren inguruan bizi izan dituzten gora-beherak azaltzearekin batera, egunotan errefuxiatu kanpamentuetan ikusi dituztenak ere azaldu dituzte. Gainera, otsailaren 27an bete ziren 34 urte Saharako Errepublika Arabiar Demokratikoa (SEAD) aldakrrikatu zela. Herri honek desertuan bizirauteko egiten duen borroka eta euren lurretara itzultzeko bizirik mantentzen duten gogoaren berri eman digute Gregorio Eizagirre eta Agustin Agotek.
<< Gregorio eta AgustinJon Mintegiaga ibartarraren eskutik Uruguayra egin dugu bidaia
1994. urtean, Uruguayn preso zituzten hiru euskal errefuxiatu estraditatzeko arriskuaren aurrean, elkartasuna adieraziz, milaka herritar atera ziren kalera. Urte hartako abuztuaren 24an, euskaldunei babesa adierazteko elkarretaratzea gogor jazarri zuen poliziak eta bi uruguaytar erail zituen: Fernando Morroni eta Roberto Facal. Jon Mintegiaga ibartarrak gertakizun horiek jaso ditu "El Filtro: memoria de los refugiados vascos en Uruguay" izeneko liburuan. Txalaparta argitaletxearekin kaleratu zuen iaz eta liburuan jaso dituenak kontatzera gerturatu zaigu Txolarre Irratira. Euskal Herriak "inoizko elkartasun keinu handiena jaso zuen Uruguayko herritaren aldetik", Jonen iritiz. Gertakari horiek gogoan hartzeak merezi zuela ikusita ekin zion liburua idazteari. Uruguayra bertara egindako bidaian jasotakoak ere bildu ditu lan honetan eta bere eskutik Latinamerikako herrialde hau gertuagotik ezagutzeko aukera izan dugu.
<< Jon MintegiagaAURREZ AURRE: Emakumeak protagonista Tolosako Aranburu Jauregian
Tolosako Berdintasun departamenduaren eskutik, AURREZ AURRE erakusketa inauguratuko dute gaur (hilak 3, arratsaldeko 19:30etan) Tolosako Aranburu Jauregian. "Emakume artistak sormen espazioen beharrean jarraitzen dute", Josebe Iturrioz, Tolosako Berdintasun teknikari eta erakusketako komisarioaren hitzetan. Hiru gune atondu dituzte egunotarako Aranburu Jauregian: horietako batean esateko zer edo zer duten artistek bere lanak erakusteko aretoa izango dute; Horretarako Tolosaldeko hainbat artistei luzatu zaie gonbidapena eta beren sormen lana erakusteko aukera izango dute. Beste gune batean, inongo gonbidapenik jaso gabe, artistak bere lanak zintzilikatu ahal izango ditu egunotan. Eta bukatzeko, beste espazio bateko hormak panel zuriekin estali, eta nor bere lana zuzenean egiteko aukera izango du bertan. Erakusketari lagunduz, "Kalean margotzen ondo pasatzen dut" izeneko tailerra ere egingo dute ostiralean, eta Ana Belen Jarrinen eskutik, hilaren 16an, "Irudirik urbilena" izeneko tailerra antolatu da. "Artea eta feminismoa" mahaingurua (hilak 4) eta "Praktika artistikoak-praktika feministak" izeneko hitzaldia (hilak 17) ere izango da egunotan. Tolosan antolatutako egitarauarekin amaitzeko, ostiralean (hilak 5), HIGA Antzerki Taldeak, "Ene pltsa handia eta biok" izeneko lana eskainiko du eta Afrikako Mendebaldeko Dantzak ere aztergai izango ditu Isabel Franc idazleak, hilaren 15ean. Ekimen guzti hauen berri eman digu, Josebe Iturrioz teknikariak Txolarre Irratian.
<< Josebe IturriozEmakumeen Mundu Martxa gure eskualdean izango da martxoaren 11n
Martxoaren 8an Irunean hasi eta bertan bukatuko du bere ibilbidea martxoaren 18an Emakumeen Mundu Martxak. Tolosaldea, hilaren 11n zeharkatuko du eta egun horren inguruan ekitaldi ugari antolatu dituzte eskualdeko Mundu Martxako Plataformatik. Edurne Epelde, Euskal Herri mailako plataformako kideak azaldu digu, lau aldarrikapen eramango dituela berekin aurtengo martxak: emakumeen aurkako indarkeriaren kontrako aldarria; emakumeen eskubide sexual eta erreproduktiboen aldekoa; emakumeak pobreziara kondenatzen dituen eredu ekonomiko neoliberal eta patriarkalaren kontrakoa eta bukatzeko, elikadura burujabetzaren aldeko mezua zabalduko dute Euskal Herri osoan zehar. Errelebo martxa izango da eta pasako den herri guztietan euren testigantza utziko dute emakumeek idatzita "Testigantza Liburuan". Horrekin batera, muralak ere pintatuko dira herriz herri emakumeen aldeko martxa aitzakiatzat hartuta. Euskal Herrian bezala, beste herrialdetan ere egingo dituzte ekimen hauek eta urrian, Kongon emango zaio amaiera 2010eko Emakumeen Mundu Martxari. Emakumeen borrokaren aitortza irudikatuko dute bertan mundu osoko emakumeek.
<< Edurne EpeldeIgandean 21. aldiz ospatuko da Lilatoia Donostian
Dena prest da datorren igandean Donostian, Lilatoia ospatzeko. Arantxa Gurmendi antolatzaile lanetan dabilen lagunak ohartarazi digu, oraindik ere osteguna arte (martxoak 4) izena emateko aukera izango dutela bertan parte hartu nahi duten emakumeek. Lehenengo Lilatoi hartan, ehun emakume pasatxok eman zuten izena eta datorren iganderako 1.500 espero dituzte. Beraz, lasterka honek hazkunde handia izan du "azkeneko hiruzpalau urtetan" Arantxak aitortu digunez. Kirola egiten duten emakumeen ikusgarritasuna kalean irudikatzea da lasterketaren helburua, baina batez ere antolatzaileek diote emakumeentzako bilgune eta ondo pasatzeko eguna izaten dela Lilatoia. Bost kilometroko ibilbidea egingo dute igandean goizeko 11.00etan hasita, Donostiako Alderdi Ederretik abiatuta.
<< Arantxa GurmendiXalbadorren hitzetan oinarritutako kantuei errepasoa
1976an, bere jaioterrian, Urepelen omenaldia egin zioten egun berean hil zen Fernando Aire "Xalbador", bihotzekoak jota. Bertsolari honek, ordea, idatzita nahiz bat-batean bertso asko utzi zituen eta euskal musikari askok baliatu dituzte hitz horiek kantuak egiteko. Saio honetan kantu horietako batzuetatik errepasoa egin dugu. Besteak beste, Xalbadorren hitzak hartuta, Anje Duhaldek, Benito Lertxundik, Estitxuk, Xabier Letek, Txomin Artolak, Imanolek eta Erramun Martikorenak egindako kantuak entzun ahal izango dituzue. Ibilbide labur bat,. Xalbadorren bertsogintza ulertu ahal izateko: bere sentiberatasuna, erlijioarekiko harremana, bere hizkuntza eta herriarekiko kezka, eguneroko objektu eta gaiei jarritako bertsoak. Horiek guztiak izan ditugu aztergai eta batez ere entzungai saio honetan. Euskal kantagintzan zehar ordubeteko errepasoa, Xalbadorrek utzitako ondarea ardatz hartuta.
<< XalbadorHezkuntza kurrikulumaren aldaketa salatzeko elkarretaratzea Tolosan
Datorren asteazkenean, Gasteizko Legebiltzarrean aurkeztuko du Isabel Celaa Hezkuntza sailburuak, hezkuntza kurrikulumaren aldaketa proposamena. Euskararen geroratzea eta normalizazioa oztopatzen duten hizkuntza politikak daramatza aurrera Eusko Jaurlaritza berriak, EHE herri mugimenduaren iritziz. Euskararen dekretua deiturikoa bertan behera utziz, beste behin ere, "euskara lehentasunezkoa izan beharrean, erderaren nagusitasuna, mantentzea, errotzea, trinkotzea eta atzeraezin bilakatzea" bilatzen ari omen dira, EHEren ustez. Herri mugimendu honek, argi du, "euskaldun eleanitzak sortzeko bide bakarra, eredu akar eta euskalduna" dela. Horren alde borrokatzeko deia luzatu diete euskal herritar guztiei. Kurrikulumaren aldaketaren harira, mobilizazioak deitu dituzte Euskal Herriko hainbat tokitan eta horietako bat, Tolosan izango da, asteazekenean (hilak 3), arratsaldeko 19.30etan Tolosako Triangulon. Deialdia luzatu digu, EHEko Gipuzkoako arduradun, Xabat Labordek.
<< EHE MobilizazioaOstiralean banatu zituzten 2009ko Aiurri Aipamen Bereziak
Laugarren aldiz, Aiurri Aipamen Bereziak banatu zituen Aiurriko erredakzio batzordeak joan dan ostiralean Asteasuko udaletxeko bideo gelan. Lau ataletan banatzen dituzte sariak. Lehena, gizarte arlokoa izaten da. 2009an Andoaingo Batzoki Elkarteak antolatutako jardunaldi gastronomikoak saritu nahi izan ditu Aiurrik. Ezberdinen arteko biltoki bihurtu baitzen jardunaldietan Andoaingo BAtzokia Elkartea. Kulturaren atalean berriz, aipamen berezia jaso zuena Gorringo antzerki taldea izan zen. Bai antzerkian edota telebistan egindako lanak nabarmendu nahi izan ditu Aiurriko erredakzio batzordeak. Ainere Tolosa eta Anjel Alkainek jaso zuten aipamena Asteasun, etxean. Kiroletako saria, Andoaingo Txirrindulari Eskolaren esku geratu zen aurten. Iaz bete zituen talde honek 25 urte eta denbora guzti honetan, harrobia lantzeko egin duen lana aitortu nahi izan zuten aipamenarekin. Bukatzeko, Ohorezko Aipamen Berezia, Anjeles Uzkudun asteasuarri eman zitzaion. Urte guztiotan, herrian egindako lanak aipamen berezia behar duela uste du Aiurrik eta Anjelesek jaso zuen ohorea. Ekitaldiko audioa duzue hemen entzungai.
<< Aipamen BereziakIbon Artola: "Aldaketa klimatikoak baditu bere erantzuleak"
Aldaketa klimatikoaz hitz egin du asteroko tartean Ibon Artola Txolarre Irratiko kolaboratzaileak. Bere hitzetan, planetaren berotzea gelditzeko, "erregai fosilak esplotatzeari utzi beharko liokete potentzia kapitalistek". Euskal Herria sozialista aldizkariko kidearen hitzetan, kapitalistei ez zaie errentagarri egiten beste energia iturri berriztagarriak esplotatzea. Horregatik, "zientzia eta teknologiaren garapenari" oztopoak jartzen dizkiete. Ondasun unibertsala beharko lukeen uraren pribatizazioaz ere hitz egin digu Ibonek. Hainbat multinazionalek ondasun hori "ustiatu eta pribatizatu egiten dute, miloika herritar egarriz hiltzen ari diren bitartean". Hainbat datu interesgarri ekarri dizkigu astero bezala Ibon Artola kolaboratzaileak Tolosaldeko Ahotsara.
<< Ibon ArtolaOff-On eskainiko dute Yolanda Arrieta eta Juantxo Zeberiok TOPICen
Yolanda Arrieta idazle bizkaitarrak kaleratu berri du "Off-on" izeneko liburua. Lan berria aurkezteko modu berritzaileen bila zebilela jarri zen harremanetan Juantxo Zeberio musikari tolosarrarekin. Elkarrekin osatu dute "Off-on" ikuskizuna eta gaur, hilak 26, eskainiko dute iluntzeko 20.00etan Tolosako TOPICen. Yolanda Arrietak liburuan jasotako testuen irakurketa egiten duen bitartean, pianoan lagunduko du Juantxo Zeberiok. Musikari tolosarrak, idazlea eta bien arteko elkarlana nondik nora etorri den azaldu digu eta horrekin batera, gonbita luzatu digu, TOPICen eskainiko den emanaldia ikustera joateko. Ordubete exkax iraungo du emanaldiak.
<< Juantxo Zeberio"1512-2012 Nafarroako Konkista" izeneko DVD emanaldia Andoainen
Bihar, osteguna, hilak 25, Andoaingo Itzala gunean "1512-2012 Nafarroako Konkista" izeneko DVD emanaldia izango da. Bideoa ikusi ostean, Nabarralde taldeko kide den Anjel Rekalderekin solasaldia egingo dute bertaratutakoek. Gaurko "Tolosaldeko Ahotsa"n, Anjel Rekalde elkarrizketatu dugu. Nabarraldek prestatutako DVDan ikusi litekeenaz hitz egin digu eta euskaldunok geure memoria historikoa berreskuratzeko beharraz. 2012an 500 urte beteko dira Gaztela eta Aragoiko armadek Nafarroa konkistatu zutela eta data hori gogoan hartuta, memoria historikoa "manipulatzeko" Nafarroako instituzioek egingo duten ahaleginaz ohartarazi digu Anjel Rekaldek. Nabarralde taldetik, baliabide mugatuekin, hori guztiari aurre egiteko ahaleginean dabiltza. Hortara dator biharko emanaldia Andoainen. Iluntzeko 20.00etan izango da Itzala gunean.
<< Anjel RekaldePentsio eta lan erreformaz Ibon Artolarekin
Denen ahotan dago, jubilazioa 67 urterarte luzatuko dutenaren kontua. Pentsio erreformaren inguruan hizketan jardun dugu gure kolaboratzaile Ibon Artolarekin. Bere esanetan, Estatu Espainiarrak 50.000 moiloi euro berreskuratu nahi ditu datozen hiru urteetan. Beste behin ere, "bankuek zor publikoarekin espekulatzeko" arriskua nabarmendu digu anoetarrak. Krisiaren harira, datu zehatzak ere eman dizkigu: Hego Euskal Herrian, 180.000 dira langabetuak eta 61.000 lagunek ez dute inongo diru sarrerarik izaten. Egoera guzti honi aurre egiteko, sindikatuek erantzun bateratua eman behar dute Ibonen ustez. Euskal Herria Sozialista aldizkariak ere, errebindikazio tabla bat ere kaleratuko du hurrengo alean; besteak beste, langabetuen sorospena mugagabea izatea, soladata minimoa finkatzea, lan kontratu guztiak finkoak izatea eta erretiro pentsioa %100an mantentzea eskatuko dute aldarrikapen horretan.
<< Ibon ArtolaEgunkaria itxi zutela 7 urte bete direnean ekitaldiak Tolosan
Egunkaria Eguna izan zen joan den larunbatean Tolosan.
Euskaldunon Egunkaria kazeta itxi zutela zazpi urte bete ziren larunbatean eta
data hori gogoratuz egin ziren ekitaldiak. Arratsaldeko 18.00etatik aurrera,
buruhandiak eta dultzaineroak, bertsolariak, O+Hatz taldea, Mulanboren kalejira,
Bonberenea txaranga, Udaberri eta Alurr taldeetako dantzarien emanaldia,
Konponezinak koadrila... izan ziren Tolosako Plaza Berrian. Era berean, Martxelo
Otamendi ere izan zen festan eta hitzaldia eskaini zuen.
Eraikinak "erortzeko arriskua" duela-eta, Inpernu Gaztetxea itxi dute
Otsailaren 5ean Tolosako Inpernu Gaztetxeko sarrera adreiluz itxi zuten. Abendu bukaeran okupatu zuen Inpernu Gazte Asanbladak Corazonistas eliza. Otsailaren 3an, arratsaldez, Ertzaintza sartu zen Gaztetxera. Eraikinak erortzeko arrisku handia zuela eta, perituarekin batera beharrezko azterketak egitera sartu ziren barrura. Une horretan Gaztetxe barruan asanbladako bi kide zeuden. Higiezinen ustezko usurpazio delitua egozten diete bi gazteei. Horietako batek epaiketa izango du datorren astean. Gazte Asanbladako kideen ustetan, zortzi urte eman ditu elizak hutsik eta inor ez da arduratu orain arte eraikinaren egoeraz. "Eraikuntza erortzeko arriskua" orain aipatzea susmagarritzat dute Inpernuko kideek. Gaztetxea desalojatzeko aitzakia da beraien ustez. Gazte Asanbladako bi kiderekin aritu gara hizketan.
<< Inpernu Gazte AsanbladaDena prest Tolosako Txosnagunea zabaltzeko eta festari hasiera emateko
Tolosako ihauteriak hasi bezperetan egon gara Euskal Herri plazan kokatuta dagoen txosnagunean. Ostegun gizenetik asteartita bitartean egongo da zabalik eta eskualdeko bederatzi eragilek hartu dute parte aurtengo batzordean. Egitarau zabala ere prestatu dute aurtengo ihauteritarako. Txosna Batzordeko kide batek eman dizkigu txosnaguneak izango dituen xehetasunen berri. Bide batez, ihauteriak abiatu aurretik Tolosako Txosna Batzordeak egin zuen adierazpena ere entzungai duzue hemen. Txosnagunearen behin betirako kokagunea Euskal Herri plazan izatea eskatzen dute batzordeko kideek. Txolarre Irratiak iñauterietan txosnagunera hurbiltzeko deia egiten die entzule guztiei.
<< Ihauterietako Egitaraua<< Adierazpena
Euskararen Semaforoa Txolarre Irratian: 2. saioa
Eskualdeko hainbat euskaltzalek martxan jarritako ekimena da Euskararen Semaforoa. Egitasmo honek badu bere bloga. Tolosaldean ere, euskaldunoi hizkuntz eskubideak urratzen zaizkigu, semaforo gorriarekin egiten dugu topo. Beste hainbat ekimenek ordea, argi berdea ematen diote euskarari. Semaforo kideek hilabeteroko bisita egin digute Txolarre Irratiari. Semaforo gorriak banatu dituzte: Eusko Jaurlaritzako Hezkuntza sailari eta geure hizkuntza eskubideen urraketak salatzeko dugun ohitura faltari. Semaforo berdea, berriz, euren seme-alabak euskara hutsezko ereduetan matrikulatuko dituzten gurasoei, abizenak euskal grafiara aldatzeko UEMAk sustatu duen kanpainari eta UEMAko udalerrietan merkatariek euskararekiko agertzen duten konpromisoari. Euskararen Semaforoa piztu da beste behin Txolarre Irratian.
<< Euskararen SemaforoaDantza sokaren bezperan, Mikel Urdangarin Anoetako Gaztetxean
Anoetan Kalderero egunareki ospatuko dute azkeneko urteotan ohitura bihurtu den Dantza Soka. Bezperatik hasi nahi dituzte ospakizunak, ordea, eta gaur (hilak 5) Anoetako Gaztetxean kontzertua eskaintzera gonbidatu dute Mikel Urdangarin musikaria. Aukera probestu eta berekin hizketalditxoa izan dugu Txolarre Irratian. Iraila erdialdean kaleratu zuen bere azkeneko diskoa, "Zubia izenekoa. Lan honen inguruko ezaugarriez aritu zaigu musikari bizkaitarra. Gauean, Anoetako Gaztetxean eskainiko duen kontzertuaren inguruko xehetasunak ere eman dizkigu "Tolosaldeko Ahotsa" saioan. Hemen duzue, Mikel Urdangarinek kotatutakoa.
<< Mikel UrdangarinFerialekuan azkeneko ukituak ematen ari zaizkie karroza eta konpartsei
Egunotan jo ta fuego ari dira lanean Tolosako koadrilak ihauterietan aterako dituzten karroza eta konpartsak prestatzen. Ferialekua izaten dute horretarako txokoa eta badira dena prestatzen hilabeteak daramatzaten gazteak ere. Egindako lan guzti horren emaitza, zaldunita egunean erakutsiko dute. Ferialekura bisita egin du Txolarre Irratiak eta lagun hauekin hitz batzuk egin ditu. Azkeneko prestaketak nola doazen azaldu digute eta izan dira batzuk, hilabeteotan gordetako misterioa agertu digutenak. Dagoeneko badakigu, aurtengo ihauteritan zenbait karrozek eramango duten gaia. Entzun ezazu hemen!
<< Konpartsa<< Konpartsa
<< Konpartsa
Dena prest Tolosako ihauteriei hasiera emateko. Eromena hastera doa!
2010eko ihauteriak aurkeztu zituzten udal ordezkariek Tolosako Ferialekuan. Toki horretan azkeneko asteotan, jo eta ke ari dira lanean herritarrak zaldunita, astelenita eta asteartita egunetan erakutsiko dituzten karroza eta konpartsak prestatzen. Andoni Iturzaeta Kultura eta Festetako zinegotziak azaldu zuenez, horiek dira festaren ardatzetako bat. Gainerakoak, txarangak eta zezenak izaten dira. Aurtengo ihauterietan izango diren nobedadeen berri eman zuten udal ordezkariek: Zerkausiko jantokia, aparkaleku eta garraio publikoa, barrakak... Aurten festak prestatzeko 22.000 euro gutxiago bideratu ditu Udalak eta herritarrek antolatutako ekimenak lehenetsi dituzte. Beraz, ez da kontzerturik antolatuko. Onintza Lasa, Berditasun Batzorde buruak, ihauterietan emakumeekiko sano jokatzeko deia luzatu zuetan eta helburu horrekin prestatu duten kanpainaren berri eman zuen.
<< Aurkezpen EkitaldiaUmetoki lepoko minbiziaz informatzeko mahaiak jarriko dituzte eskualdean
Otsailak 5, Minbiziaren Aurkako Nazionarteko Eguna da. Hori dela eta urtero Gipuzkoako Minbiziaren Aurkako Elkarteak kanpaina bat abiatu nahi izaten du kontzientziazio eta prebentzioaren alorrean. Aurten umetoki lepoko minbizian jarriko dute arreta. Horretarako mahaiak jarriko dituzte herrialde osoan eta Tolosan (Triangulon eta Zentro Soziokulturalean), Zizurkilen (Pedro Mari Otaño eskolaren inguruetan) eta Villabonan (Plaza Berrian). Gaitz honen inguruko xehetasun guztiak jaso ahal izango dira mahai hauetan. Maider Sierra elkarteko prebentzio arloko psikologoak hiru gomendio luzatu nahi izan dizkigu: ohiko azterketa ginekologikoak egitea; sexu harremanetan beharrezko kontua edukitzea eta bukatzeko GPB txertoaren inguruan informazioa eskuratzea.
<< Maider SierraAndere Nahia taldearen hitzaldia Tolosan, Berdintasun Sailak bultzatuta
Tolosako Berdintasun Departamenduak gonbidatuta Ezpeletan egoitza duen Andere Nahia taldeak hitzaldia eskainiko du gaur (hilak 2) Tolosako Udaletxeko pleno aretoan. Orain 10 urte sortu eta emakumez osatutako taldea da Andere Nahia. Enpresa munduan dabiltzan eta hasi nahi dute emakumeei bideratuta egiten du lan taldeak. Aholkularitza teknikoaz gain, beste hainbat aspektu ere lantzen dituzte. Onintza Lasa Tolosako Udaleko batzorde buruak azaldu digunez, "elkartasuna" dute oinarri gisa Andere Nahian parte hartzen duten emakumeek. Denboraren bankua proiektua lantzen ari dira Tolosan azkeneko hilabeteetan eta iparraldeko emakume hauek daramaten dinamika interesgarria izan litekeelakoan antolatu dute hitzaldia. Onintza Lasak eman dizkigu argibideak.
<< Onintza LasaAbizenak euskal grafiara aldatzeko kanpaina sustatu du UEMAk eskualdean
UEMAk bultzatuta "Guk abizena, zuk?" kanpaina jarri da martxan Tolosaldeko UEMAko herrietan, euskal abizenak modu ofizialean eta toki guzietan euskaraz izan nahi dituztenentzat. UEMAko Zuzendaritza Batzordearen ustez, "hizkuntza bateko abizenak beste hizkuntza batean idaztea ez da normala". Ekimenaren helburua normalizazioa besterik ez dela gaineratu dute kanpainaren sustatzaileek, eta gogorarazi dute hizkuntza normalizatuetan ez dela horrelakorik gertatzen. Abizena euskal grafiara moldatu nahi dutenek eman beharreko pausoen berri eman digu Imanol Haro, UEMAko hizkuntza normalizatzaileak. UEMAtik kanpoko herrietan pauso bera jarraitu behar dute herritarrek, baina Aduna, Irura, Anoeta, Elduain, Belauntza, Leaburu-Txarama, Gaztelu, Orexa, Ikaztegieta, Altzo, Orendain, Baliarrain, Alegia eta Amezketako udaletan konpromisoa lortu du mankomunitateak kanpaina gauzatu ahal izateko.
<< Imanol HaroSarean murgildu da gaur Txolarre Irratia: zutagu.net eta badok.info
Berria egunkariaren egitasmoa da Euskal Kantagintzaren Ataria. 60. hamarkadatik euskarazko kantagintzak izan duen bilakaera jasotzen du web guneak. Bide batez, musika talde eta bakarlarien inguruko biografiak, diskografiak, argazkiak, kantuak eta bideoak ere bildu dituzte. Eresbil Musika Artxiboaren laguntza jaso dute web gunea atontzeko Jon Eskisabel proiektuaren koordinatzaileak aipatu digunez. Bestalde Txolarre Irratian ZutaGu sare sozialaz ere hitz egin dugu Gorka Juliorekin. Gainerako sare sozialak bezala, elkar ezagutzan jartzen ditu pertsonak zutagu.net egitasmoak baina, badu helburu gehigarri bat: ezagutzak partekatu nahi dituztenentzako pentsatuta baitago. Gai diferenteen inguruko taldeak sortu eta hainbat tresna partekatu ahal izango dira gai horren inguruko ezagutza zabaltzeko. Gorka Julio informatikariak azaldu digu guztia.
<< Jon Eskisabel<< Gorka Julio
Txolarre Irratiak antolatutako jaialdiko bertsoak entzungai dagoeneko
Uste baino erantzun hobea izan zuen larunbatean Txolarre Irratiak bere 10. urteurrena ospatzeko antolatutako lehen ekitaldiak. Leidorren sartu ezinik geratu zirenei barkamenak eskatu behar dizkiegu antolakuntzatik. Hala ere, jaialdian botatako bertsoak entzuteko bigarren aukera bat ere badute HEMEN. Esteka horretan klikatuz gero, bertsoaldi-bertsoaldi larunbateko jaialdia jarraitzeko aukera izango duzue. Txolarre Irratiak, beste behin ere, eskerrak eman nahi dizkie saio honen antolakuntzan lanean aritu diren guztiei eta larunbatean Leidorrera azaldu ziren herritar guztiei.
Venezuelako azkeneko gertaerak aztergai Ibon Artolarekin
Ikasleen martxak antolatu dira azkeneko egunotan Venezuelan Chavezen gobernuaren aurka. Bi gazteren erailketa ere gertatu da tartean. Egoera nahasi honetan, RCTV telebista kate pribatua ixtea erabaki du Venezuelako gobernuak. Ibon Artola, Txolarre Irratiko kolaboratzaileak gogoratu digu, Fedecamaras patronalarekin batera RCTV telebistak parte hartzea izan zuela 2002ko Estatu Kolpean. Mundu mailan sistema kapitalistak bizi duen krisi egoerak eragina ere badu Venezuelan. Bolivarraren debaluazioak eta elikagaien espekulazioak egoera larria eraman du Latino Amerikako herrialdera. Euskal Herria Sozialista aldizkariko kidearen hitzetan, "iraultza bururaino ez eramateak" ekarri du egoera aldrebesa. Langile klaseak, hamar urtez konfidantza erakutsi du eraman duten prozesuan, "baina iraultzak arriskua handia bizi du, gaur egun, herritarrak behar handiak sumatzen dituztelako eguneroko bizitzan". Hala ere, prozesu iraultzailea azkeneraino eramateko prest dago Venezuelako langile klasea Ibon Artolaren iritziz.
<< Ibon ArtolaBertso Eguna eta Nafarroako Txapelketa hizketagai "Zortziko Aldrebesa"n
Bertsolaritzari astero eskaintzen diogun "Zortziko Aldrebesa" tartean bi kontu izan ditugu nagusi aste honetan. Larunbatean Donostian ospatuko den Bertso Eguna eta dagoeneko abiatu den Nafarroako Bertsolari Txapelketa. "Hustubetehustu" leloarekin eta Jorge Oteizaren inguruan ardaztuta joango da larunbatean Bertso Eguneko ekitaldi nagusia Kursaal aretoan. Horren aurretik Donostiako Parte Zaharrean ibiliko dira bertsolariak eguerdian eta gauean berriz bertso afaria izango da Kursaaleko jatetxean. Jon Agirresarobe Bertsozale Elkarteko sustapen arloko eragileak azaldu digu aurtengo Bertso Eguna. Lorea Arburua berriz, Nafarroako Bertsolari Txapelketaren koordinatzailea da. Aurreko asteburuan ospatu ziren aurreneko bi final-laurdenak eta hurrengo asteetan txapelketa barruako saio gehiago izango dira. Final erdietan Julio Soto, Inigo Olaetxea eta Jon Barberena. Aurtengo finalean ez parte hartzea erabaki dute iazko txapeldunak, Xabier Silveirak eta Erika Lagomak, besteak beste. Martxoaren 20an jokatuko da finala Lesakako frontoian eta bien bitartekoak azaldu dizkigu Lorea Arburuak.
<< Jon Agirresarobe<< Lorea Arburua
Herri kontsulta egin dute Amarozen auzoaren etorkizuna irudikatzeko
Joan den larunbata eta igandean Tolosako Amaroz auzoan herri kontsulta egin zuten. Auzoak dotazio mailan dituen beharren gainean, erantzen bat eskatzen zuten premien eta etorkiun hurbilean zer nolako herria nahi duten irudikatu ahal izan zuten amaaroztarrek asteburuko kontsultan. Horretarako EHUko Parte Hartuz ikerketa taldearen laguntza jaso dute. 300dik gora lagun gerturatu dira bi egunetan, eskolaurre zaharrean jarritako gunetara eta 450 ekarpen inguru jaso dira idatziz. Orain Parte Hartuz taldeko kideak, gogoeta guztiak bildu, ordenatu eta txosten batean bilduko dituzte. Bigarren fase batean, ondorio horiek herritarrei helaraziko zaizkie eta azkeneko ekarpenak egin ahal izango dituzte. Prozesua amaitzeko ondorio guztiak Tolosako Udalari jakinaraziko zaizkio, beharrezko neurriak har ditzan. Amaroz Auzo Elkarteko kidea da Juan Manuel Zaldua eta parte hartze prozesu honen inguruko xehetasunak eman ditu Txolarre Irratian.
<< Juan Manuel ZalduaEHEk deitutako mobilizazio eguna Egunkariaren alde
Euskal Herrian Euskarazek, herri mugimenduko eragile euskaltzaleak Mobilizazio Eguna deitu du gaurko (hilak 26). "Euskarari erasorik ez! Euskaraz bizitzeko Egunkaria libre!" leloa eramango du mobilizazioak. Villabonan Mintzola aurrean bilduko dira arratsaldeko 19.30etan. Hitzordu horiekin, EHEk Egunkairaren kontrako auziaz egiten duen irakurketa helarazi nahi dio gizarteari. Urratsak emanez euskaraz biziko den herria irudikatu nahi du EHEk, euskarazko hedabideak erabiliz, defendatuz eta lehenetsiz. Villabonako EHEko kide Xabat Labordek eman ditu xehetasun guztiak Txolarre Irratian.
<< Xabat LabordeGida baimena ateratzeko euskarazko materiala Buruntzaldeko udalerrietan
Buruntzaldeko Euskara Batzordeek euskararen erabilera sustatzeko hainbat egitasmo jarri dituzte martxan. Eta, oraingoan, Semaforo berdea: orain gidabaimena euskaraz. Eman bidea ekimena aurkeztu dute. Helburua auto-eskoletan euskararen erabilera normalizatzea da herritarrek zerbitzua euskaraz izan dezaten. Buruntzaldean dauden 11 auto-eskolek parte hartuko dute egitasmoan eta materiala dagoeneko banatu zaie. Gainera, maiatzean gazteei zuzendutako kanpaina abian jarriko dela ere aurreratu zuten. Marifer Gorostiza Lasarte-Oriako Euskara Zerbitzuko teknikaria da.
<< Marifer GorostizaKalderero egunean eskualde mailako manifestazioa AHTaren kontra
Otsailaren 6an, arratsaldez, eskualde mailako manifestazioa deitu du Tolosan AHT Gelditu Elkarlanak. Joan dan larunbatean Hendaia eta Irun artean egin zen mobilizazioa jendetsua izan zen. Horren aurretik izan genituen gurean Tolosaldeko Elkarlaneko kideak. Bide batez, makro-proiektu honek gure eskualdean daramatzan pausoak azaldu zizkiguten. Azkeneko hiru urtetan bezela, kalderero egunean, eskualdeko mailako manifestazioa egingo da Tolosako Triangulotik abiatuta eta gure eskualdeko herritarrei bertan parte hartzera dei egiten diete.
<< Tolosaldeko AHT Gelditu ElkarlanaInperialisten okupazio arriskua Haitiko hondamendiaren ondoren
Zenbait iturrik Haitik izandako lurrikarak 500.000 hildako ere eragin dituela diote. Dena dela, Txolarre Irratiko kolaboratzaile Ibon Artolak, egunotan hedabide handietan agertzen ez den Haitiko beste errealitatea erakutsi digu. "Indar inperialistek beti jo puntuan izan duten herrialdia izan da Haiti" Ibonen ustetan eta orain, AEB bezelako potentziek, hondamendia herrialde hori okupatu eta etekina ateratzeko erabiliko ez ote duten beldur da Euskal Herria Sozialista taldeko kidea. Bien bitartean, laguntza humanitarioaren zain, lehenaz gero bizi zuten zapalkuntza biderkatuta bizi dute orain haitiarrek Artolaren ustez.
<< Ibon ArtolaMobilizazio ugari Tolosan Elena Calen erailketaren ondoren
Euskal Herrian indarkeria matxistak eraildako lehen emakumea izan da Elena Cal eta bere hilketa Tolosan gertatu da. Sekretupean gorde zuen sumarioa poliziak eta ezer gutxi jakin da eraso honen inguruan. Gaur gaurkoz, bere bikotea aske da eta ustez Elenaren hiltzailea izateagatik espetxeratu dute bere mutil lagun ohia. Arbuio zabala jaso zuen Elenaren hilketak Tolosan. Josebe Iturrioz Berdintasun teknikariak, halako gertakari bat izaten denean, udaletxe barruan martxan jartzen duten protokoloaren inguruko xehetasunak eman dizkigu. Astelehen iluntzean, Udalean egindako ezohiko udalbatzarrare ostean, Berdintasun Saileko buru, Onintza Lasak egindako adierazpenak ere entzungai dituzue hemen eta Plaza Zaharrean egindako elkarretaratzean, Tolosaldeko Bilgune Feministak egindako irakurketa ere entzuteko moduan duzue.
<< Josebe Iturrioz<< Onintza Lasa
<< Tolosaldeko Bilgune Feminista
Ezker Abertzaleak kritikatu egin ditu Tolosako 2010eko aurrekontuak
Tolosako udaleko hautetsi independentsitek urte amaieran udalbatzak onartu zituen aurrekontuen inguruko irakurketa egin zuten atzo Tolosako Kultur Etxean eskainitako agerraldian. Ezertan hasi aurretik, Jokin Bildarratz Tolosako alkateak Ezker Abertzaleari udal eztaidan parte hartzeko eskubidea ukatu diola salatu zuten hautetsiek. Ezker Abertzaleko hautetsiekagerraldian, 2010. urterako onartu diren aurrekontuen inguruko irakurketa egin nahi izan zuten. Modu orokorrean aipatzeko, aurrekontuak egiteko prozeduran udal ordezkariek bakarrik parte hartu dutela aipatu zuten. Onartutako aurrekontuak atzerakoiak direla eta Tolosako Udala geldialdira eramango dutela. Bere burua babesteko eta aurpegia garbitzeko krisiaren mozorroa erabili izana egotzi diete hautetsi independistesk udal gobernuko ordezkariei.
<< AdierazpenakPeio Olano lizartzarrak tortura basatiak jasan dituela salatu du
Joan den hilaren 8an Lizartzako bere etxean atxilotu zuten Peio Olano herritarra, ustez ETA kide izatea egotzita. Inkomunikatuta eman zituen bost egun Guardia Zibilaren eskuetan asteartean Grande Marlaska Auzitegi Nazionaleko epailearen aurrean deklaratu aurretik. Bost egunetan, "basatiki" torturatu dutela salatu du Peiok eta gezurrezko deklarazioa sinarazi diotela. Asteartean espetxera bidali zuen Grande Marlaska epaileak lizartzako herritarra. Tolosaldeko Ezker Abertzaleak Peiok jasandako torturak salatzeko manifestazioa antolatu du ostiralerako (hilak 15, arratsaldeko 19.30etan Triangulon). Bestalde, Lizartzako herritarrek ere babesa eskaini diote espetxeratu berriari eta bere sendiari. Peioren abokatu, Iker Sarriegik adierazi duenez, "fisikoki ahul dagoen arren, buruz argi eta indartsu dago" Lizartzako herritarra.
<< AdierazpenakOrain 25 urte Donostiako Kontxan egindako eski proba gogoan
Egunotako elurtea azken 25 urteotako handiena izan da, adituen arabera. Juxtu orain 25 urte, urtarrilaren 15en Donostiako Kontxan eski proba gogoangarria egin zen Donostiako Herri Irratiak antolatuta. Ehun partaidetik gora izan ziren lehia bitxi eta ikusgarri hartan eta, ikusminak jota, milaka lagun inguratu zen proba ikustera. Parte hartzaileen artean tolosar asko egon ziren, horien artean Josu Iztueta gaur solaskide izan duguna. 1985ean Kontxako pasealekuan egin zen eski proba horretan beste tolosar bat atera zen garaile: Angel Ortiz, garai hartan Euskadiko txapelduna zena. Ostegunean, hilak 14, Tolosako Kultur Etxeko areto nagusian, iluntzeko 20.00etan orain 25 urteko eski proba hartuko dute gogoan. Orduko bideo irudiak, argazkiak eta protagonisten anekdota eta komentarioak jasoko dira. Josu Iztueta aritu zaigu duela 25 urteko kontuak berritzen.
<< Josu IztuetaJuan Joxe Agirrek Lazkaokokomentuko altxorra erakutsi digu
Galtzaundi Euskara Taldeak, "Eskerrak Zuri" Ohorezko Aipamena eman zion abenduan Juan Joxe Agirre alegiarrari. 1930. urtean jaioa, txikitan egin zuen Lazkaora Beneditarren komentura bi osaba baitzituen bertan fraide. Irakasle lanetan aritu ondoren, 60. hamarkada bukaeran komentuko artxiboa egokitu eta osatzeko ardura hartu zuen bere gain Juan Joxek. Bartzelonan bibliotekonomia ikasketak egin zituen, fraide alegiarrak aitortu digunez "bokazio handirik gabe". Handik bueltan ordea, pasioz ekin zion tokiko dokumentazioa biltzeari. Berehala jabetu zen zeinen garrantzitsua zen historiarako gisa horretako dokumentazioa bildu eta gordetzea. 40 urte daramatza lanean eta artxiboa erakutsiz berekin egin dugun bisitan erakutsi duen gogoak adierazi digu bertan bildutako altxorraren balioa. Lazkaoko komentuaren ondoan egiten ari diren eraikin berriak jasoko ditu liburutegiko altxor horietako asko eta etorkizunean etorriko direnak. Galtzaundi aldizkaria eta Txolarre Irratia, Lazkaoko liburutegi eta artxiboko zuzendari Juan Joxe Agirrerekin izan dira.
<< Juan Joxe AgirreCorazonistas eliza okupatu dute Tolosan Inpernu Gaztetxea bihurtzeko
Abenduak 29, goizeko 11.00ak inguruan okupatu dute Tolosako apeadero ondoan dagoen Corazonistas eliza Tolosako Inpernu Gazte Asanbladako (TIGA) kideek. Udaran egindako okupazio saiakeran hiru egun eraikinaren barruan eman ondoren desalojatu zituzten gazteak baina ez zuten etsi. Tolosako gazteentzat elkargune autogestionatu baten beharraz aspaldi jabetuta daude TIGAko kideak eta hori dela eta Tolosako eraikina okupatzea erabaki dute. Hamar bat gaztek okupatu dute eliza gaztean eta orain garbiketa lanak egiten ari dira. Gazte Asanbladako kideak, bestalde, herritarrak informatzen ari dira, bizilagunekin hitz egin dute eta udaletxera ere gerturatu dira udal ordezkariekin hitz egiteko asmotan. Biharko deitu dituzte udaletxean eta bien bitartean gazteak gune alternatibo hau atontzen jarraituko dute. Gune irekia dela azpimarratu digute eta beraz herritar guztiei gonbitea luzatzen diete gerturatu daitezen. Eliza okupatu eta ordu gutxira egon da Txolarre Irratia, TIGAko gazteekin.
<< T.I.G.A.Tolosaldeko euskal preso politikoen senideen testigantza
"Aiztondora" lelopean, urtezahar egunean manifestazioa antolatu dute bailara hortako preso politikoen senide eta lagunek. Villabonako Udalak babes osoa agertu dio mobilizazioari. Ostegunean, arratsaldeko 19.30etan abiatuko da manifestazioa Villabonako plazatik eta Zizurkilgoan bukatuko da. Bien bitartean, larunbatean Etxeratek deitutako Manifestazio Nazionala izango da Bilbon. Gure eskualdeko Etxerat elkarteak ere bertara joateko deia luzatu dio euskal jendarteari. Txolarre Irratiak, Galtzaundirekin batera, mahaiaren inguruan bildu ditu eskualdeko preso politikoen senideak. Bai presoek, bai euren senide eta lagunek bizi duten jazarpenaren berri eman digute. Antolatutako mahainguruaren pasarteetako batzuk dituzue hemen entzungai.
<< Tolosaldeko Etxerat 1<< Tolosaldeko Etxerat 2
<< Tolosaldeko Etxerat 3
Desordutan taldeak "Eromena zor dizut" diskoa aurkeztu digu
Bonberenea Ekintzak zigiluarekin kaleratu du Desordutan Tolosako musika taldeak disko berria. "Etxean" grabatu dutela aitortu digute taldeko kide Txus eta Inigok. Anoetako Gaztetxean kontzertua eman aurretik gonbidatu ditugu gurera. 10 kantu dira diskoan bildu dituztenak eta taldean lan egiteko eraz, kantuetan esan nahi dutenaz eta Desordutanek bizi duen momentuaz hitz egin digute. Diskoa gainera, www.desordutan.com web gunetik ere jeitsi litekeela adierazi digute taldekideek. Solasaldi atsegina egin dugu Desordutaneko musikariekin eta hemen duzue entzungai.
<< DesordutanAhozko ondarea biltzeko eta zabaltzeko lanean ari da Ahotsak proiektua
Euskal Herriko Ahotsak. Proiektu honen helburu nagusia da, Euskal Herriko ahozko ondarea eta herri hizkerak bildu eta hedatzea da; hau da, gure herrietako adineko jendea elkarrizketatu, eta euren euskara eta bizipenak jasotzea eta herritarren artean zabaltzea. Horretarako www.ahotsak.com web gunea baliatu dute proiektu honen arduradunek. Aurrerantzean, hemen Tolosaldean, Miren Artetxe arituko da elkarrizketa horiek egiten. Ahozkotasunaren altxor hori berreskuratzeko lanean, Tolosaldeko herritarrei dei egin diete Ahotsak taldeko arduradunek proiektuan parte har dezaten. Adineko pertsonak izango dira elkarrizketatuko dituztenak eta interesa duenak, miren@ahotsak.com helbidean jarri beharko du harremanetan arduradunekin. Miren Artetxerekin solasaldi luzea izan dugu Txolarre Irratian. Hemen duzue entzungai.
<< Miren ArtetxeTolosaldea Sahararekin elkarteak hainbat ekimen jarri ditu abian
Aminatu Haidar giza eskubideen aldeko ekintzaile sahararra goizaldean iritsi da Aaiuneko (Mendebaldeko Sahara) bere etxera. Segurtasun neurriak handiak dira. Izan ere, hainbat lagunek, komunikabide eta ekintzaileak batez ere, Haidarrengana hurbildu nahi izan dute eta kale batzuk ere moztu behar izan dituzte. Tolosaldea Sahararekin elkarteak bere egoera salatzeko deituta zituen mobilizazioak bertan behera utzi ditu, baina hala ere, gaur (abenduak 18) arratsaldeko 19.00etan elkarretaratzea egingo dute Tolosako Plaza Zaharrean. Bestalde, Tolosaldea Sahararekin elkarteak beste hainbat asmo ere baditu martxan. Otsailaren 19tik 26ra Tindufeko errefuxiatu kanpamenduetan ospatuko den maratoian parte hartzera animatu nahi dituzte eskualdeko herritarrak. Bestalde, urtero bezala, janari bilketa abiatu dute eskualdean urtarrila bukaera bitartean. Iaz 10.000 kilo bildu zituzten eta aurten beste hainbeste jasotzea espero dute.
<< Saharako Maratoia<< Piztu Itxaropena
Aurrera darrai Egunkaria auziko epaiketak Audientzia Nazionalean
Asteartean hasi zen Egunkaria-ren itxierako epaiketa, Espainiako Auzitegi Nazionalean. Auzipetuek asteartean deklaratu zuten, eta ETArekin loturarik ez zutela izan nabarmendu zuten. Fiskalak ez zien galderarik egin. Herenegun guardia zibilak mintzatu ziren epaileen aurrean, eta ez zuten Egunkaria-ren eta ETAren ustezko harremanez frogarik aurkeztu. Urtarrilaren 12an izango da hurrengo saioa. Dignidad y Justicia eta AVT herri akusazioek 12 eta 14 urte arteko kartzela zigorra eskatzen dute bost auzipetuentzat. Epaiketaren hasiera honen inguruan bere iritzia eman du gure eskualdeko auzipetuak, Martxelo Otamendik. Fiskalak beraiei galderarik egin ez izana positiboki baloratzen dute, baina oraindik ere epaiketak ekarri dezakenarekin kezkatuta daude. Bihar (hilak 19) manifestazio nazionala burutuko da Bilbon eta bertara joateko joateko deia luzatu dute euskal gehiengo sindikalak, hainbat alderdi politikok eta eragilek. Epaiketa hasi aurretik, Martxelo Otamendirekin Txolarre Irratian egin genuen elkarrizketa duzue hemen entzungai.
<< Martxelo OtamendiAfrika Txakanam: Onditz Jauregi eta Luisa Monteceloren abentura berria
Aurretik Afrika ekialdian ibili ziren Onditz Jauregi eta Luisa Montecelo, Nahikari Iturberekin batera AmaAfrika izeneko proiektuarekin. Luisa eta Onditz afrikara itzuli berri dira. Oraingo honetan kontinente hartako mendebaldean zehar ibiliko dira, gutxienez, datorren udara bitartean. Etiopia jarri dute bidai honetan helmugatzat, baina itsutu gabe. Bidaiaz gozatu nahi baitute hurrengo hilabete hauetan. Horretarako furgoneta prestatu eta abiatu ziren egunean bertan izan genituen Txolarre Irratian gure eskualdeko bi gazteak. Karga-karga eginda eraman zuten furgoneta azkeneko hilabeteotan bildutako hainbat materialekin. Dena Afrikan uzteko asmoa dute. http://afrikatxakanam.blogspot.com helbidean izango dituzue bidaiaren inguruko kronikak. Abiatu aurretik kontatu zigutena berriz hemen duzue entzungai.
<< Afrika TxakanamIruna Veleiako eztabaidaz hizketan Arantxa Zabalarekin
Urtebete beteko da aurki, Arabako Foru Aldundiak Iruna Veleiako aztarnategiaren inguruan adituen batzordea osatu eta txostena kaleratu zuela. Aurreko urteetan, Eliseo Gil eta bere taldeak egindako aurkikuntzak faltsuak zirela zabaldu zuen lau haizetara adituen batzordeak. Zenbait herritar, ordea, ez datoz bat jaurtikitako iritzi horiekin eta datazio berriak eskatzen dituzte besteak beste, egindako aurkikuntzen benetakotasuna edota faltsutasuna frogratzeko. Herritar horietako bat da, Arantxa Zabala zizurkildarra. Luze eta zabal hitz egin dugu berekin Txolarre Irratian, hainbeste hauts harrotu dituen gaiaren inguruan.
<< Arantxa Zabala"...arteraino" diskoa aurkeztu du Iker Goenagak Txolarre Irratian
"...arteraino" izeneko diskoa kaleratu du Iker Goenagak irailean. Aurreko bere diskoekin egin bezela, Txolarre Irratira gonbidatu degu, bere lan berria hobeto ezagutzeko. Oraingo honek, ordea, badaarki nobedade bat: EZ DAKIENAK BALEKI zigilua baliatuz, autoekoitzi egin baitu diskoa Ikerrek. Taldean egiten duen lanaz aritu zaigu soinu jole zizurkildarra eta lan honetan bildutako kantuen inguruko informazioa ere eman digu. Zizurkilen bertan, urria hasieran aurkeztu zuen disko berria eta hemendik gutxira, Amezketan izango da "...arteraino" honetan bildu dituen kantuak aurkezten. Solasaldi atsegina izan dugu Ikerrekin eta zuek ere atsegina baduzue hemen entzun ahal izango duzue elkarrizketa oso osorik.
<< Iker Goenaga